Presidenti i FIFA-s, Gianni Infantino, ka konfirmuar se tifozët e ekipeve që do të kualifikohen për Kupën e Botës 2026 do të kenë procedura të lehtësuara për hyrjen në vendet organizatore. Në një konferencë për mediet në Nairobi, pas takimit me 54 presidentët e federatave afrikane, Infantino theksoi se “të gjithë do të jenë të mirëpritur në Kanada, Meksikë dhe Shtetet e Bashkuara”.

Ai sqaroi se janë përhapur keqkuptime mbi këtë çështje, por FIFA po bashkëpunon ngushtë me qeveritë e tri vendeve pritëse për të garantuar një proces sa më të thjeshtë. “Në Botërorin e Klubeve këtë vit në SHBA, patëm tifozë nga 164 vende pa asnjë problem. Edhe për 2026 procedurat e vizave do të jenë të qarta dhe të aksesueshme për të gjithë”, tha Infantino.

Kupa e Botës e ardhshme do të jetë më e madhja në historinë e turneut, me 48 skuadra, 104 ndeshje dhe mbi gjashtë milionë tifozë të pritur në stadiume. Pjesa më e madhe e takimeve do të zhvillohet në SHBA, me 11 nga 16 qytetet organizatore të vendosura atje. Infantino konfirmoi se FIFA është në koordinim të vazhdueshëm me autoritetet amerikane për të thjeshtuar procedurat e hyrjes, duke siguruar angazhimin e qeverisë amerikane për këtë proces.

Shefi i FIFA-s shtoi se zgjerimi i turneut nga 32 në 48 ekipe u bë për t’u dhënë më shumë vendeve, përfshirë ato afrikane, mundësinë për të marrë pjesë në eveniment. Deri tani, asnjë ekip afrikan nuk është kualifikuar, ndërsa 10 shtete të tjera e kanë siguruar tashmë vendin e tyre në fazën finale.

“Botërori nuk është vetëm futboll, por një mundësi për të bashkuar botën”, tha Infantino. “Presim miliona tifozë dhe duam që ky të jetë një festival i madh, më i madhi në historinë e FIFA-s”.

sfidanti.al