Hansi Flick dhe Barcelona do të vazhdojnë rrugëtimin e tyre së bashku deri në verën e vitit 2027. Pas fitimit të titullit kampion në La Liga, palët kanë arritur marrëveshjen për zgjatjen e kontratës. Sipas presidentit Joan Laporta, mungon vetëm firma për ta bërë gjithçka zyrtare.

Në një intervistë për RAC1, Laporta u shpreh entuziast për vazhdimësinë me teknikun gjerman:

“Jemi shumë të kënaqur me punën që po bën Hansi. Ai arriti të përmbysë situatën dhe të rikthejë frymën garuese të skuadrës. Kemi folur me drejtorin sportiv Deco, i cili do të mbyllë marrëveshjen së shpejti dhe më pas do ta zyrtarizojmë rinovimin.”

“I atribuoj një pjesë të madhe të suksesit të skuadrës. Flick ka disiplinë, forcë mendore dhe një ndjeshmëri të veçantë. Ka ditur të bëjë çdo lojtar të ndihet i rëndësishëm dhe ky ka qenë një çelës i suksesit këtë sezon. Është i lumtur te Barça, po argëtohet dhe po na argëton. Na tha se po jeton njërën nga periudhat më të bukura të karrierës së tij.”

Një bilanc mbresëlënës

Hansi Flick mbërriti në Barcelonë në korrik të vitit të kaluar, pas përvojës si trajner i përfaqësueses së Gjermanisë. Në 58 ndeshje në krye të Barçës, ai ka regjistruar 43 fitore dhe vetëm 8 humbje, me një mesatare prej 2.34 pikësh për ndeshje, një performancë që tejkalohet vetëm nga koha e tij te Bayerni (2019–2021), ku kishte një mesatare prej 2.53 pikësh në 86 ndeshje.

Vazhdimësia me Flick përfaqëson një garanci stabiliteti dhe ambicie për Barcelonën, e cila synon të ndërtojë një cikël fitues dhe të rikthehet në majat e futbollit evropian.