Pas një karriere të gjatë në Europë mes PSV Eindhoven, Manchester United, Olympique Lyon, Barcelona, Atletico Madrid dhe kombëtares holandeze, Memphis Depay vendosi verën e kaluar të pranonte ofertën e Corinthians-it dhe të provonte një kampionat më “egzotik” si ai brazilian. Dhe duhet thënë se ndikimi me realitetin e ri ka qenë krejtësisht pozitiv: 7 gola dhe 1 asist në 11 paraqitje të sezonit të kaluar, 1 gol dhe 1 asist në paraqitjen e vetme të bërë këtë sezon. Përveç numrave, Depay ka lënë një shenjë të madhe në këtë realitet të ri, duke detyruar madje federatën të ndryshojë rregulloren. Që nga tani, kush luan në Brazil nuk mund të ngjitet mbi top me të dyja këmbët, përndryshe do të marrë një karton të verdhë. Ky vendim erdhi pas një lëvizjeje të ngjashme të holandezit në finalen e kampionatit paulista ndaj Palmeiras-it, që në Brazil nuk u mor aspak mirë.

“Ne shfrytëzojmë këtë mundësi për të trajtuar një temë shumë të rëndësishme në futbollin tonë dhe në atë amerikano-jugor, e cila teorikisht ka një ndikim negativ në sportin tonë,” shkruan presidentët e klubeve në një komunikatë të përbashkët. “Këto janë sjellje të caktuara që kanë shkaktuar kaos, duke krijuar përplasje dhe dëmtuar ndjeshëm imazhin e një sporti që ka një shpërndarje të gjerë kombëtare dhe ndërkombëtare.” Komisioni i arbitrave i CBF ka dhënë kështu këtë udhëzim për gjyqtarët: “Pasi të identifikojnë këtë sjellje, ata duhet ta ndëshkojnë me një goditje indirekte për ekipin kundërshtar, nga pika e shkeljes dhe ta ndëshkojnë shkelësin me karton të verdhë.”Komentet e menjëhershme nga disa lojtarë, përfshirë ‘yllin’ e kampionatit Neymar, ishin të forta kundër kësaj rregulle të re: “Futbolli po bëhet gjithnjë e më i mërzitshëm,” komentoi O’Ney në rrjetet e tij sociale.

sfidanti.al