Emanuel Egbo nuk do të jetë më trajner i Bylisit. Lajmi është bërë i ditur nga vetë klubi mallakastriot pas  rezultateve jo të mira që ka pasur ne kampionat. Vendin e tij në pankinë do ta marrë ish-trajneri i Tiranës dhe Elbasanit, Nevil Dede. Emanuel Egbo dhe Bylis kanë mbyllur bashkëpunimin pas 6 javëve të kampionatit. Vetë trajneri nigerian ka pasur dhe një bisedë me presidencën duke i parashtruar qëndrimin e tij, ndërsa në një prononcim në faqen e klubit Egbo ka pohuar se:

“Ka qenë një vendim shumë i vështirë për mua, por kur bëhet fjalë për Bylisin kam menduar për më të mirën e skuadrës! Më mirë të lëviz unë, duke marrë përsipër ndryshimin, por edhe duke shpresuar sa më parë te kthesa. E kam menduar gjerë e gjatë dhe ja kam parashtruar edhe presidentit si mik prej vitesh, se një ndryshim tashmë që është herët mund të sjellë përmirësimin e ekipit dhe kjo lëvizje mund të jetë në të mirën e Bylisit. Unë jam pjesë e këtij klubi, jam mik me presidentin dhe dua kthesën e Bylisit, që mua më ka dhënë shumë si lojtar por edhe si trajner vite më parë. Nuk e heq presidenti trajnerin, sidomos duke ditur edhe marrëdhëniet që unë kam me Kapllanajn prej vitesh, sepse janë lojtarët ata që luajnë, prej nga varet rezultati, por edhe trajneri. Por edhe pas kësaj, unë do të vazhdoj që të jem afër Bylisit, si tifozi më fanatik, sepse Ballshi është, ka qenë dhe do të mbetet shtëpia ime! E bëra këtë hap sepse dua që Bylisi të ndryshoj dhe në fund të sezonit ta shoh në Europë, sepse skuadrat e tjera nuk kanë asgjë më shumë. Ky është një vendim personal i imi, falënderoj të gjithë ata që bashkëpunuam, Ballshi dhe Bylisi janë në zemrën time! Mirupafshim, Forca Bylis”,- tha Emanuel Egbo. Tashmë trajneri i Bylisit do të jetë një tjetër emër me shumë eksperiencë nën drejtimin e disa ekipeve në kampionatin tonë si Nevil Dede.

Këtë fundjave Bylisin e pret një sfidë mjaft e rëndësishme me Elbasanin, në orën 16.00 në stadimin “Adush Mucaj”.

sfidanti.al