Një pasdite pothuajse perfekte për Atalantën u errësua nga dëmtimi i rëndë i Berat Gjimshitit, i cili u detyrua të braktisë fushën në fundin e pjesës së parë, mes dhimbjeve dhe lotëve. Mbrojtësi shqiptar u rrëzua menjëherë pas një goditjeje drejt portës, duke vënë dorën në zonën e kofshës dhe barkut, shenjë e qartë e një problemi serioz fizik.

Djimsiti nuk arriti ta vazhdonte ndeshjen dhe u zëvendësua nga Hien, ndërsa pamjet e tij duke dalë nga fusha i përlotur shkaktuan shqetësim të madh te stafi teknik dhe tifozët bergamaskë. Fillimisht u mendua për një problem muskulor në kofshën e majtë, por ekzaminimet e para kanë dhënë një pasqyrë më të qartë të situatës.

Në orët në vijim, Gjimshiti do t’u nënshtrohet ekzaminimeve të specializuara, të cilat do të përcaktojnë saktësisht shkallën e dëmtimit dhe kohën e rikuperimit. Aktualisht, mbetet e paqartë se për sa kohë mbrojtësi do të mungojë, por ekziston frika se ai mund të humbasë disa ndeshje të rëndësishme.

Për Atalantën, dhe veçanërisht për trajnerin Raffaele Palladino, dëmtimi i Gjimshitit përfaqëson një goditje të ndjeshme, duke pasur parasysh rolin kyç që shqiptari ka në repartin mbrojtës. Klubi dhe tifozët shpresojnë që ekzaminimet të sjellin lajme më pozitive dhe rikthimi i tij të mos vonohet shumë.

sfidanti.al