Sezoni nuk ka nisur mirë, por edhe kaq po na tregon shumë. Lojtarët shqiptarë pritet të kenë një vit sportiv shumë të mirë në Europë, siç e treguan Enis Çokaj dhe Xhakomo Vrioni. Mesfushori Çokaj ishte vendimtar në javën e parë të Ligës së Parë të Kroacisë, duke ndihmuar ekipin e tij, Lokomotivën e Zagrebit në barazimin 2-2 ndaj Hajdukut të Splitit. Shqiptari ishte autor i të dy asistëve të golave, që u shënuan përkatësisht nga Nikola Soldo dhe Marko Dabro në fund të pjesës së parë dhe në nisje të së dytës. Tek Lokomotiva e Zagrebit ka disa lojtarë shqiptarë, siç janë Enis Çokaj, Albion Marku, Jon Mersinaj, Indrit Tuci, Arbër Hoxha dhe Hajdin Salihu.

Ndërkaq, vazhdon forma e mirë e Xhakomo Vrionit në Austri. Sulmuesi 22-vjeçar, pasi realizoi 4 herë në dy ndeshje miqësore për Vaker Tirolin e Insbrukut, e përsëriti veten në raundin e parë të Kupës së Austrisë. Tiroli fitoi 3-0 në fushën e Leobendorfit, dhe Vrioni shënoi njërin prej golave. Futbollisti i Shqipërisë U21 dhe që bën pjesë tashmë në organikën e kombëtares, është huazuar nga Juventusi në Bundesligën e Austrisë me synim për të fituar përvojë dhe për të pasur minutazh në fushë. Duket se gjithçka po shkon mbarë, të paktën deri tani.

Sfidanti.al