Real Madridi po përgatitet të thyejë rekorde si në shpenzime, ashtu edhe në të ardhura. Klubi madrilen ka arritur në një nivel të paprecedentë të kostove të personelit, ndërsa parashikimet financiare për sezonin e ri flasin për një xhiro rekord prej 1.405 miliardë eurosh. Vera ka qenë mjaft e ngarkuar në merkaton e madrilenëve. Përveç ndryshimit në stolin teknik me mbërritjen e José Mourinhos, klubi ka afruar disa emra të rëndësishëm, mes tyre Ibrahima Konaté, Denzel Dumfries, Marc Cucurella, Bernardo Silva, Yan Diomande dhe Carlos Espí. Një tjetër lëvizje e rëndësishme ishte rinovimi i kontratës me Vinícius Júnior.
Sipas portalit të specializuar “2Playbook”, kostoja totale e personelit dhe amortizimi i kontratave të lojtarëve kanë arritur në 707 milionë euro. Kjo është shifra më e lartë e regjistruar ndonjëherë nga Real Madridi dhe e afron klubin me Paris Saint-Germain, një prej skuadrave me shpenzimet më të mëdha në futbollin botëror. Një pjesë e këtij buxheti shkon edhe për sektorët e tjerë sportivë. Basketbolli i meshkujve përfaqëson 44.4 milionë euro, ndërsa ai i femrave 8.5 milionë euro. Bordi drejtues, i kryesuar nga Florentino Pérez, ka vendosur gjithashtu të rrisë buxhetet për këto dy seksione, përkatësisht në 67 dhe 33 milionë euro.
Megjithatë, shpenzimet e larta mbështeten në parashikime po aq ambicioze për të ardhurat. Shifra prej 1.405 miliardë eurosh do të përbënte një rekord të ri në historinë e klubit dhe do ta mbante faturën e personelit në rreth 50% të të ardhurave të parashikuara, brenda parametrave të kërkuar nga UEFA. Një rol vendimtar në këtë drejtim pritet të ketë “Santiago Bernabéu”. Stadiumi parashikohet të gjenerojë rreth 420 milionë euro përmes biletave, abonimeve, sponsorizimeve, muzeut, ambienteve VIP dhe organizimit të eventeve të mëdha, përfshirë një ndeshje të NFL-së.
Të ardhura të konsiderueshme pritet të vijnë edhe nga shitja e futbollistëve. Lëvizjet e lojtarëve si Nico Paz, Víctor Muñoz, Gonzalo García, César Palacios dhe Jacobo Ortega, mes të tjerëve, llogariten të sjellin rreth 155 milionë euro. Kështu, Real Madridi po ndërton një model financiar ku shpenzimet rekord shoqërohen me objektiva po aq të mëdha për të ardhurat, me Florentino Pérez që synon të ruajë fuqinë ekonomike të klubit në nivelet më të larta.
