Kur thua Pep Guardiola, ke parasysh futbollin sulmues dhe shpërthyes si shampanja. Gjithsesi, edhe trajneri katalanas mund të ketë ndonjë “version” tjetër dhe të tillë e tregoi në fitoren 1-0 arritur në fushën e Totenhemit. Kampionët ia dolën në “Uembli” në ndeshjen e vlefshme për Premier Ligën, veçse në mënyrë krejt jokarakteristike për ta, duke shënuar shpejt, e duke mbrojtur rezultatin.

“Kjo ishte fitore e mbrojtjes”, vërejti me të drejtë “Deili Meili”. Për të gjashtën ndeshje radhazi në kampionat, Siti nuk pësoi gol, diçka që ndodhi për herë të fundit në 2015. Totenhemi i vuri në vështirësi kampionët, sidomos me rastet e Harri Kejnit dhe Erik Lamelës, por ekipi fitues duhet të ketë edhe një portier të madh, dhe Siti pati brazilanin Ederson. Në fund të ndeshjes, Guardiola vlerësoi ekipin e tij, por theksoi edhe se “për habi, fusha e “Uemblit” ishte aq e keqe, saqë ishte tepër e vështirë të luhej futboll”.

Sfidanti.al