Për arsye të kuptueshme, Romano Floriani Mussolini ka tërhequr gjithmonë shumë vëmendje. Ai është djali i Alessandra Mussolinit, një ish-deputete e njohur, dhe stërnipi i Duces. Mbrojtësi, i cili është në pronësi të Lazios, shënoi golin e tij të parë si profesionist në ndeshjen mes Juve Stabias dhe Cesenas. Një gol i rëndësishëm që e ka ngjitur ekipin kampan në vendin e katërt në renditje. Romano Floriani Mussolini, ende pa mbushur 22 vjeç, po përjeton sezonin e tij të parë në Serie B si protagonist me Juve Stabian, surpriza e madhe e kampionatit. Skuadra verdheblu ndodhet në vendin e katërt pas Sassuolos, Pisas dhe Spezias, që kryesojnë renditjen. Stabiesët fituan 1-0 ndaj Cesenas dhe goli vendimtar u shënua pikërisht nga stërnipi i Duçes. Pas këtij goli të parë si profesionist, ai fitoi menjëherë popullaritet global. Festimi i tij ishte plot pasion: ai vendosi gishtin tregues në buzë, një gjest i zakonshëm mes futbollistëve, por që gjithsesi nxiti diskutime. Floriani Mussolini mban mbiemrin e dyfishtë: Floriani nga i ati dhe Mussolini nga e ëma. Vitin e kaluar, fanella e tij kishte mbishkrimin “Floriani M.”, ndërsa këtë vit është shkruar “F. Mussolini”. Kur ai shënoi, spikeri i stadiumit të Castellammare di Stabia e tha emrin e tij me qartësi: “Ka shënuar Romano…” dhe publiku iu përgjigj në kor: “Mussolini.” Kjo ndodhi tre herë. Natyrisht, kjo ishte e pashmangshme duke qenë se ky është mbiemri i tij dhe ai është i shkruar në fanellë, por gjithashtu të pashmangshme ishin edhe diskutimet dhe polemikat që pasuan.

sfidanti.al