Për herë të parë në një sezon kampionati ai ka pësuar 10 humbje dhe kjo duket se ka ndikuar pa masë. Zhoze Murinjo nuk është mësuar të mundet kaq shpesh, e ndoshta nervozizmi po bën të vetën aq sa lëshoi një sulm të papritur ndaj kolegut të tij, Ole Gunar Solskjerit. Trajneri i Totenhemit deklaroi se “Soni (lojtari koreanojugor) është me fat që babai i tij është njeri më i mirë sesa Ole”. Kjo, pasi Solskjeri e akuzoi Sonin se kishte bërë teatër në pjesën e parë për të nxjerrë nga loja Skot Mektominain. “Ne nuk duhet të mashtrohemi, – tha norvegjezi, – nëse djali im rri shtrirë në fushë për 3 minuta dhe duhen 10 vetë që ta ndihmojnë të ngrihen, unë e lë pa drekë. Ne nuk u mashtruam, por u mashtrua gjyqtari”. Edhe para ndeshjes, trajneri i Mançester Junajtidit akuzoi Erik Lamelën e Totenhemit në rolin e tij për përjashtimin e Entoni Marsialit në ndeshjen e parë mes dy ekipeve.

Sfidanti.al