Ishin dy banderola që shkaktuan ndalimin dy herë të ndeshjes së të dielës në Bundesligë, mes Unionit të Berlinit dhe Volfsburgut. Tifozët vendas së pari u hodhën kundër Federatës duke nxjerrë banderolën e parë, ku protestohej kundër kthimit të dënimeve kolektive nëpër stadiume, diçka që ata thoshin ishte hequr që në 2017-ën! Në pankartë, pati edhe një ofendim “vendçe” për DFB-në, pra për Federatën gjermane, nga ata që nuk i merr lapsi.

Më pas, doli banderola e dytë, me shënjestër presidentin dhe pronarin e Hofenhajmit, Ditmar Hop. Njëlloj si pankarta e ultrasve të Bajernit, në të lexohej “bir k…”, si dhe ishte fytyra e Hopit, e vendosur në shenjestër sikur po ekzekutohej. Arbitri ndaloi dy herë ndeshjen, që përfundoi 2-2. Trajneri i Unionit të Berlinit, Oliver Runert (Ruhnert), deklaroi për DAZN-in se “ishin dy banderola të ndryshme”. “Ofendimet personale padyshim që nuk janë të pranueshme, ndërsa banderola e parë ishte një kritikë ndaj Federatës, dhe kritikat mund të thuhen”, – ishte gjykimi i tij. Autoritetet në Gjermani janë shumë të alarmuar për sulmet ndaj Hopit, pasi pritet që të bëhen edhe nga ultrasit e tjerë, si ata të Dortmundit apo Shalkes.

Sfidanti.al