Një kthesë e papritur ka shoqëruar organizimin e ndeshjes mes Olympique Marseille dhe Olympiacos në Europa League. Vetëm pak orë pas vendimit për të ndaluar udhëtimin e tifozëve grekë, autoritetet franceze e shfuqizuan masën, duke u lejuar atyre të ndjekin takimin në stadiumin “Vélodrome”. Sipas La Provence, ndeshja ishte klasifikuar në nivelin më të lartë të rrezikut, 5 nga 5, për shkak të tensioneve të mundshme mes tifozërive. Shqetësimet lidhen veçanërisht me marrëdhëniet e afërta mes ultrasve të Marsejës dhe atyre të AEK Athens, rivalëve të përbetuar të Olympiacos.

Të martën në mëngjes, prefektura kishte nxjerrë një dekret që ndalonte tifozët grekë të hynin në qendër të Marsejës dhe në stadium. Vendimi shkaktoi pakënaqësi te drejtuesit e Olympiacos, të cilët u befasuan nga masa e marrë në prag të ndeshjes. Megjithatë, vetëm disa orë më vonë, në mbrëmje, autoritetet franceze ndryshuan qëndrim dhe e shfuqizuan ndalimin, duke autorizuar udhëtimin e tifozëve mysafirë. Për të shpjeguar këtë kthesë, prefektura iu referua nevojës për të siguruar përforcime të forcave të rendit, në një periudhë të karakterizuar nga mobilizime dhe protesta të tjera.