Barcelona ka marrë një lajm të rëndësishëm gjatë përgatitjeve për rikthimin në kampionat. Frenkie de Jong është bashkuar me pjesën tjetër të skuadrës në stërvitjen e së martës, duke bërë një hap të madh drejt rikthimit në dispozicion të trajnerit Hansi Flick. Mesfushori holandez ka munguar për gati katër muaj pas dëmtimit të ligamentit anësor të gjurit të djathtë, të pësuar gjatë Botërorit 2026. De Jong zgjodhi trajtimin konservativ, pa ndërhyrje kirurgjikale, ndërsa rikuperimi i tij ka qenë gradual. Vetëm një ditë më parë ai kishte punuar individualisht, ndërsa tashmë ka nisur stërvitjen kolektive. Megjithatë, rikthimi në grup nuk do të thotë se De Jong është menjëherë gati për ndeshje. Barcelona nuk dëshiron të marrë asnjë rrezik dhe synon që mesfushori të rikthehet vetëm kur të jetë plotësisht i gatshëm.

Në stërvitje është rikthyer edhe Karim Adeyemi, pas grumbullimit me kombëtaren gjermane. Sulmuesi ishte titullar në të dyja ndeshjet e fundit, ndaj Holandës dhe Greqisë, duke luajtur në krahun e djathtë. Adeyemi zhvilloi 80 minuta ndaj Holandës dhe dha një asistim në barazimin 1-1, ndërsa ndaj Greqisë luajti 76 minuta. Me Barcelonën këtë sezon ka regjistruar tre gola dhe tri asistime.

Ndërkohë, Raphinha dhe Joan Garcia vazhdojnë të stërviten veçmas. Braziliani u largua para kohe nga grumbullimi i kombëtares për shkak të shqetësimeve në kofshën e djathtë, por kontrollet nuk zbuluan një dëmtim serioz. Portieri Joan Garcia vijon rikuperimin nga edema dhe shqetësimet në gjurin e djathtë. Te Barcelona shpresojnë që ai të jetë gati për rikthimin e La Ligës, por ditët në vijim do të jenë vendimtare. Rikthimi i De Jong në stërvitjen kolektive është një sinjal pozitiv për Barcelonën dhe Hansi Flick, edhe pse klubi do të tregojë kujdes maksimal për të shmangur çdo rrezik të një dëmtimi të ri.