Presioni mbi presidentin e FIFA-s, Gianni Infantino, po rritet ndjeshëm, teksa gjithnjë e më shumë figura të njohura të futbollit po kërkojnë ndryshime në drejtimin e organizatës.

Ish-mbrojtësi i Manchester United dhe Francës, Mikael Silvestre, pjesë e FIFA Players’ Voice Panel, publikoi të hënën në rrjetin social X një deklaratë të fortë me mesazhin: “Mjaft është mjaft!”. Ai kërkoi ndryshime strukturore në FIFA.

Deklarata e Silvestre u shpërnda edhe nga kampioni i botës me Francën në vitin 1998, Emmanuel Petit, si dhe nga futbollistja angleze Lucy Bronze.

Infantino po përballet gjithashtu me kritika lidhur me një plan të diskutueshëm për shitjen e aksioneve në një kompani që synon të menaxhojë aspekte të Kupës së Botës te investitorë privatë. Sipas deklaratës së publikuar nga grupi i lojtarëve, shumë prej tyre ndajnë të njëjtat shqetësime me miliona tifozë në mbarë botën.

“Për një kohë të gjatë kemi parë vendime të rëndësishme të merren pa u konsultuar apo marrë në konsideratë lojtarët dhe pa respektuar tifozët që e mbështesin këtë sport”, thuhet në deklaratë.

Më tej, lojtarët argumentojnë se ndryshimi është i domosdoshëm, duke pretenduar se përqendrimi i pushtetit ka bërë që drejtuesit aktualë të FIFA-s të humbin aftësinë për të dalluar interesat e tyre nga ajo që është më e mira për futbollin.

Deklaratat e fundit e shtojnë presionin publik ndaj Infantinos në një periudhë kur FIFA po përballet me debate të forta mbi mënyrën se si drejtohet dhe mbi përfshirjen e lojtarëve dhe tifozëve në vendimmarrje.