Temperaturat e larta me të cilat shpesh detyrohet të luajë në turne të gjatë mund të jenë ndoshta kundërshtari më i madh që lideri i renditjes botërore has gjatë sezonit. Kolapsi fizik i Jannik Sinner-it në Roland Garros këtë të enjte ka rikthyer në vëmendje një dobësi që prej kohësh e ndjek tenistin italian: vështirësia e tij e dukshme për të garuar në kushte të nxehtësisë ekstreme. Numri një i botës u mposht në Paris nga Juan Manuel Cerundolo, në një ndeshje të zhvilluar në temperatura shumë të larta që i shkaktuan ngërçe dhe vështirësi për të qëndruar në këmbë.

Incidenti në Australi kishte hapur tashmë debatet nëse kjo ndjeshmëri ndaj temperaturave të larta ka origjinë fizike apo edhe gjenetike, një diskutim që tani është rikthyer me forcë. Vetë italiani, megjithatë, preferon të mos nxjerrë përfundime të nxituara, ndonëse pranon se është një aspekt mbi të cilin po punon për t’u përmirësuar.

“Nuk e dimë. Fizikisht ndihem mirë, edhe mendërisht gjithashtu, dhe ndonjëherë e vetmja gjë që mund të bëj është të luftoj. Është diçka në të cilën dua të përmirësohem. Shkoj çdo ditë në palestër për këtë, por çdo lojtar ka problemet e veta të vogla dhe ndoshta ky është imi”, ka shpjeguar ai.

I vetëdijshëm për problemin, skuadra e tij po kërkon zgjidhje aktive. Një nga strategjitë është zhvillimi i një pjese të përgatitjes në Dubai, për të përshtatur trupin me kushte më të vështira klimatike. “Shkojmë në Dubai për klimën. Ndonjëherë ndiej se nuk ka një shpjegim të qartë. Nuk kam fjetur mirë dhe ndoshta edhe kjo ka ndikuar”, ka shtuar ai.

Pavarësisht vështirësive në vapë, Sinner mbetet shumë i suksesshëm në Australian Open, ku ka regjistruar 17 fitore dhe ka fituar dy tituj radhazi. Megjithatë, episodi në Paris ka rihapur diskutimin mbi arsyet pse ai vuan më shumë se kundërshtarët e tij kur temperaturat rriten.

Ky nuk është megjithatë një rast i izoluar. Kujtohet se në Australian Open, Sinner përjetoi një situatë të ngjashme në raundin e tretë kundër Ethan Spizzirrit. Në atë ndeshje, ngërçet e lanë thuajse të palëvizshëm, por mbyllja e çatisë së fushës në momentin kritik i lejoi të rikuperohej dhe të siguronte fitoren. “Pata fat që u mbyll çatia”, kishte pranuar vetë ai.

sfidanti.al