Trajneri i Bayern Munich, Vincent Kompany, ka vlerësuar maksimalisht formën dhe zhvillimin e Harry Kane, duke theksuar se sulmuesi anglez nuk është vlerësuar sa duhet gjatë periudhës së tij në Angli.

Që prej transferimit nga Tottenham Hotspur drejt gjigantëve bavarezë, Kane ka parë një rritje të ndjeshme të reputacionit të tij në arenën ndërkombëtare. Në Premier League ai konsiderohej një ‘bomber’ i nivelit të lartë, por jo gjithmonë në elitën absolute të futbollit botëror. Ndërkohë, te Bayerni, ku ka arritur të fitojë trofe, profili i tij është rritur ndjeshëm.

Kompany beson se 31-vjeçari ka evoluar më tej në Bundesligë, duke treguar cilësi që më parë nuk janë vlerësuar plotësisht. “Në Angli e shihnin kryesisht si golashënues. Finalizimi dhe lidershipi i tij nuk janë vënë kurrë në dyshim,” u shpreh tekniku belg. “Por këtu kemi parë edhe aspekte të tjera të lojës së tij, si inteligjenca futbollistike. Ndoshta kjo është nënvlerësuar më parë.” Trajneri shtoi se Kane është një lojtar që përmirësohet me kalimin e kohës, duke e krahasuar me një verë të mirë që bëhet më cilësore me moshën. Dhe kjo është reflektuar qartë edhe në ndeshjet më të mëdha.

sfidanti.al