Në prag të ndeshjes vendimtare kualifikuese për Kampionatin Botëror, atmosfera në kampin kuqezi është e qartë: strategjia është sulmi. Gjatë konferencës për shtyp, një nga mesfushorët e Kombëtares Shqiptare, Qazim Laçi, zbuluar planin e skuadrës, duke theksuar se objektivi është të mbyllin ndeshjen sa më shpejt të jetë e mundur.

Duke pranuar se përballja do të jetë “shumë e vështirë” kundër një kundërshtari me “shumë lojtarë me cilësi”, lojtari parashikoi një betejë të fortë në mesfushë. Sipas tij, të dy ekipet do të nisin lojën me kujdes për të gjetur stabilitetin, por Shqipëria nuk ka ndërmend të presë. “E dimë që do të jetë një ndeshje e fortë. Duhet që nga minuta e parë të hyjmë në fushë me qëllim ta mbarojmë ndeshjen sa më shpejt,” u shpreh ai.

Pavarësisht se kundërshtari përshkruhet si një ekip agresiv, plani i kuqezinjve mbetet i pandryshuar: presion i lartë dhe kërkimi i golit që në fillim, për të mos i lënë asgjë rastësisë në këtë sfidë vendimtare.