Në prag të ndeshjes vendimtare kundër Polonisë për fazën “play-off” të Botërorit, mbrojtësi i Kombëtares Shqiptare, Elseid Hysaj, foli në një konferencë për shtypin, duke ndarë pritshmëritë, sfidat dhe ëndrrën e madhe për kualifikim. Hysaj theksoi se ekipi është plotësisht i fokusuar dhe i vetëdijshëm për rëndësinë historike të këtyre ndeshjeve.

Duke iu përgjigjur pyetjeve mbi mungesat e rëndësishme të lojtarëve si Rei Manaj dhe Mirlind Daku, kapiteni kuqezi pranoi se ato janë humbje të ndjeshme, por shprehu besim të plotë te lojtarët e tjerë.

Megjithatë, Hysaj u tregua realist dhe me këmbë në tokë, duke paralajmëruar se një fitore ndaj Polonisë është vetëm hapi i parë në një rrugëtim të vështirë me dy ndeshje. “Nuk mund të gëzohemi pas Polonisë, sepse na pret një ndeshje tjetër edhe më e rëndësishme. Ndeshja e parë është e rëndësishme, por e dyta do të jetë ndeshja e jetës. Në atë ndeshje nuk do të ketë as lodhje, as minuta, asgjë. Do ta luajmë me zemër për të bërë krenarë sa më shumë shqiptarë,” përfundoi Hysaj, duke bërë të qartë se skuadra e ka kuptuar se përpara ka dy finale për të arritur ëndrrën historike.

sfidanti.al