Një epokë mbyllet në futbollin botëror. Edinson Cavani ka njoftuar këtë të diel fundin e karrierës së tij profesioniste, në moshën 38-vjeçare. Sulmuesi uruguaian, aktualisht pjesë e Boca Juniors, zgjodhi rrjetet sociale për t’i dhënë lamtumirën sportit që i dha gjithçka nga vetja. “Faleminderit shumë, futboll! Ti më formove, më vure në provë dhe më mësove të ngrihem sa herë rrëzohesha. Më mësove të vlerësoj çdo hap të rrugës”, shkroi Cavani në mesazhin e tij prekës të ndarjes. Ai theksoi se pa familjen, miqtë, shokët e skuadrës, trajnerët dhe tifozët, asgjë nga kjo rrugë e jashtëzakonshme nuk do të kishte qenë e mundur.

“Po largohem i qetë, me ndërgjegjen e pastër, duke ditur se kam dhënë gjithmonë maksimumin në çdo stërvitje dhe në çdo ndeshje, me gabime dhe suksese, por gjithmonë me respekt për këtë profesion”, shtoi “El Matador”, duke treguar madhështinë jo vetëm si futbollist, por edhe si njeri. Karriera e Cavani ishte një udhëtim i jashtëzakonshëm: nga Danubio te Palermo, nga Napoli te PSG, më pas Manchester United dhe Valencia, për ta mbyllur në mënyrë simbolike te Boca Juniors, një nga klubet më historike të Amerikës së Jugut.

Me Uruguain, Cavani regjistroi 136 ndeshje dhe shënoi 58 gola, ndërsa kulmi i karrierës së tij mbetet triumfi në Copa América 2011. Ai fitoi gjashtë tituj kampion në Francë, ishte golashënuesi më i mirë i Ligue 1 në dy sezone radhazi dhe i Serisë A me Napolin. Sot, Cavani i var këpucët në gozhdë, por emri i tij mbetet i gdhendur përgjithmonë në historinë e futbollit. Një luftëtar i heshtur, një bomber i lindur, një legjendë që nuk do të harrohet.

sfidanti.al