Në futbollin spanjoll, tensionet mes Real Madridit dhe drejtuesve të La Liga-s janë rikthyer fuqishëm. Presidenti i Barcelonës, Joan Laporta, ka akuzuar Real Madridin se po zhvillon një fushatë të hapur presioni për largimin e Javier Tebas nga pozita e Presidentit të La Liga-s. Në një dalje për mediet, Laporta u shpreh se ajo që ka parë së fundmi nga drejtuesit madrilen është shqetësuese. Sipas tij, në asamblenë e fundit të Real Madridit, klubi “Los Blancos” ka sulmuar hapur kreun e kampionatit spanjoll, një sjellje që për Barcelonën ngre shumë pikëpyetje.

“Ajo që ndodhi në asamblenë e Real Madridit, kur sulmuan presidentin e La Liga-s, më bën të mendoj keq. Edhe unë kam pasur mosmarrëveshjet e mia me Javier Tebas, por ai është një person fisnik, e jeton me pasion detyrën e tij dhe mundohet për të mirën e kampionatit, u shpreh numri 1 i klubit katalanas. Sipas Laportës, ndërsa Barça mban një marrëdhënie normale me institucionet, Real Madridi po ndjek një linjë konfrontimi që synon të sjellë një ndryshim në krye të La Liga-s.

“Real Madridi duket se është fiksuar ta largojë Tebas-in për të vendosur dikë tjetër. Kjo nuk më jep aspak besim. Nuk i besoj kësaj strategjie, vijoi më tej Presidenti i blaugranasve. “Tebas bën gjithçka që mundet për atë që është më e mira për La Ligën, kështu që më bën të dyshoj se, të nxitur nga Real Madridi, po përpiqen ta largojnë atë për të vendosur dikë tjetër”, tha ndër të tjera Laporta. Ndërkohë, Presidenti i Barçës siguroi se brenda skuadrës katalanase mbizotëron uniteti dhe besimi, si në fushë ashtu edhe jashtë saj.

sfidanti.al