Brazili po punon me shpejtësi të madhe për të gjetur një trajner të ri dhe, megjithëse ëndrra e madhe e Konfederatës Braziliane të Futbollit (CBF) mbetet Carlo Ancelotti, ka disa kandidatë për këtë detyrë të vështirë, ndërkohë që ka mbetur vetëm një vit deri në fillimin e Kupës së Botës 2026. Sipas gazetarit brazilian André Rizek nga ‘Sportv’, emri më i fundit që është shtuar në listë është José Mourinho. Që në janar 2023, kur Mourinho drejtonte Romën, vetëm pak javë pas përfundimit të Katar 2022, CBF kishte shfaqur një interes të madh për të siguruar shërbimet e tij. Megjithatë, ai e refuzoi ofertën, duke u përqendruar te pjesa e dytë e sezonit me klubin italian. Tani, me “The Special One” që po kalon një moment të vështirë te Fenerbahçe, vendimi i tij mund të jetë krejt ndryshe. Përveç Ancelottit dhe Mourinhos, në garë janë edhe Jorge Jesus dhe Abel Ferreira, dy trajnerë të tjerë portugezë që janë përfolur që pas eliminimit të Brazilit në Katar 2022. Megjithatë, afrimi i tyre nuk do të jetë i lehtë. Jorge Jesus drejton Al-Hilal, kurse Abel Ferreira është trajner i Palmeiras-it. Të dyja skuadrat do të luajnë në Kupën e Botës për Klube, dhe është e sigurt se asnjëra prej tyre nuk dëshiron të humbasë trajnerin e saj të paktën deri në përfundim të turneut.

sfidanti.al