Humbja me Kastriotin ka bërë që Kukësi të lëshojë terren, sa i takon garës për mbijetesë pa pasur nevojën e një ndeshje shtesë. Në dy javët e fundit, verilindorët morën një goditje jo të vogël sa i përket objektivit, pasi bëhej fjalë për dy rivalë direkt, me të cilët do të diskutonte “play out”-in. 180 minuta vendosën edhe fatet e këtij sezoni, edhe pse të paktën evituan rënien në mënyrë direkte. Me 6 pikë larg, kur kanë mbetur edhe tri ndeshje, Kukësi ka vetëm shpresa matematikore. Për këtë arsye, të gjitha gjasat janë që trajneri Fatjon Tafaj të nisë të mendojë që tani për “play out”-in, aty ku do të ndeshet me një nga skuadrat e Kategorisë së Dytë. Tri ndeshjet e fundit që kanë mbetur, shihen si teste të mira për të dërguar lojtarët dhe skuadrën në formën optimale në ndeshjen shtesë. Rënia në të Dytën do të ishte fatale për klubin, që ka fituar gjithçka në elitën e futbollit shqiptar. Tri sfidat e fundit, blutë do t’i kenë me Lushnjën dhe Burrelin në shtëpi, si edhe Pogradecin në transfertë. 

sfidanti.al