Çiklizmi ka qenë dhe mbetet një nga sportet me imazhin më të dëmtuar nga dopingu, sidomos pas historisë së Lens Armstrongut, veç “dyrrotakësit” nuk kanë vetëm problemin e substancave të ndaluara. Një ngjarje tronditëse ka ndodhur në Turin e Dubait, ku një çiklist ka akuzuar një tjetër se e ka goditur me grusht. Akuzuesi është gjermani Marsel Kitel, i skuadrës “Kuik Step Flors”, që kryeson renditjen e garës. Pas etapës së tretë, ai postoi në Tuiter një foto të vetvetes, me fytyrën ku i rridhte gjaku dhe me sqarimin: Unë nuk do të pranoj ndjesë për këtë, kjo nuk ka të bëjë aspak me çiklizmin, ajo që bëri Grivko ishte një turp për sportin tonë”.

Ukrainasi Andrij Grivko, i skuadrës Astana, u pezullua menjëherë nga gara dhe skuadra e Astanës kërkoi falje, diçka që nuk u pranua nga Kiteli. Madje, ai shkruajti edhe një mesazh kërcënues për Grivkon, “kërkova në gugëll (google) informacion për Grivkon dhe pashë se peshon 70 kg, le t’i njohë kufijtë e tij”. Kërcënimi ishte i qartë sepse Kitel peshon 86 kg. Gjermani tregoi se ngjarja e shëmtuar ndodhi në pjesën fillestare të etapës së tretë 200 km të gjatë, kur po kalonin pranë një vendi ku erërat kryqëzoheshin dhe ngrinin rërë. Papritur Grivko e goditi me grusht. Nuk kuptohet nëse kanë pasur ndonjë llogari të mëparshme, apo incidenti është krijuar në garë e sipër.

Sfidanti.al