Kristaps Porzingis shkëlqeu edhe një herë fort dhe jo vetëm ndihmoi Nju Jorkun në sukses, por edhe fitoi duelin në distancë me superyjet e tjerë të NBA-së. Letonezi tepër shtatlartë shënoi 34 pikë në më pak se 27 minuta, ndërsa Niksët triumfuan në “Medison Skuer Garden” ndaj Sakramentos, me shifrat 118-91. Fitore e thellë dhe paraqitje e madhe e qendrës prej 2 metrash e 21 centimetrash.

Porzingis pati edhe 5 topa në tabela, 2 asistë, 2 bllokime gjuajtjesh të kundërshtarëve, si dhe nuk e humbi asnjë herë topin. Për këtë, faqja zyrtare e NBA-së i dha vlerësimin prej 31 pikësh, që ishte më i larti i mbrëmjes së fundit. Rivali më i afërt i tij ishte Stefën Kërri i Golden Stejtit, në fitoren e thellë 135-114 ndaj Filadelfias. Kërri shënoi 22 pikë, kapi 4 topa në tabela, shërbeu 9 asistë. Kërri pati vlerësimin +29 pikë, ndërsa shoku i tij i skuadrës, Kevin Durant, pati vlerësimin +24. Pas tyre ishte Xhejms Harden që shënoi më shumë pikë se të gjithë, por që mor vlerësimin +23, ndërsa Lebron Xhejms, me gjithë fitoren e Klivlendit, nuk mori “notë shumë kaluese”, vetëm +5.

Porzingis është shënuesi i tretë më i mirë i NBA-së në sezon, me 30.4 pikë për ndeshje, ndërsa para tij janë vetëm Janis Antetokumpo dhe Xhejms Harden. Letonezi është i treti edhe për bllokimet e gjuajtjeve të kundërshtarëve. Nju Jorku, pas shumë vitesh, ka bilanc pozitiv, me 7 fitore e 4 humbje.

Sfidanti.al