Ato janë shtyrë vetëm për shkak të luftërave botërore, por tashmë duket se do të ndalen për një sëmundje. Lojrat Olimpike janë në rrezik për t’u shtyrë, ndonëse Japonia, organizatorja e tyre, këmbëngul që të zhvillohen. Në këtë drejtim ishte edhe ceremonia e dorëzimit të flakës olimpike, që u krye në Athinë të Greqisë, dhe ku ministri grek i sporteve, Spiros Kapralos, i dorëzoi pishtarin olimpik ish-notares olimpike japoneze, Imoto Naoko. Ceremonia ishte në vendin tradicional, në stadiumin “Panathinaiko” të Athinës, aty ku u mbajtën Lojrat e para moderne Olimpike në 1896, ndonëse pa praninë e spektatorëve. Qeveria japoneze dhe Komiteti Olimpik Ndërkombëtar kanë këmbëngulur që Lojrat duhet të mbahen sipas kalendarit në datat 24 korrik-9 gusht, por gjendja e koronavirusit është e tillë që ato mund të shtyhen, siç ndodhi me Europianin e futbollit dhe Kupën e Amerikës.

Sfidanti.al