Ambiciet kanë qenë gjithmonë, por duket se po vjen edhe besimi. Sporti ynë ka njohur disa medalje ndërkombëtare këta vjet, me shqiptarë dhe të natyralizuar, dhe një të tillë e ka fituar sërish boksi. Pas suksesit të madh të Alban Beqirit në Kampionatin Botëror për të rritur vjet në Beograd, vjen ai i adoleshentit Amar Koçi, që arriti deri në finalen e Kampionatit Europian për të rinj në Itali. Boksieri 16-vjeçar, që i përket klubit të Studentit në kryeqytet, bëri një paraqitje të shkëlqyer në gjysmëfinale ndaj sportistit vendas, Xhuzepe Çirilo. Të pesë gjyqtarët e dhanë fitoren me pikë për shqiptarin dhe rezultati i përgjithshëm ishte 147-138 për Koçin. Kampioni kuqezi e dominoi sfidën ndaj italianit në të tre raundet duke merituar finalen. Pasi ka siguruar medaljen e argjendit, 16-vjeçari do të synojë të artën, pra edhe titullin europian në finalen e sotme ndaj gjeorgjanit Giorgi Natroshvili. Sesioni i pasdites në ringun e Romës nis në orën 18:00, por shqiptari do të jetë në ndeshjen e parafundit sepse i përket peshës deri 75. Ashtu si në gjysmëfinale, Koçi do të jetë me uniformë blu dhe kundërshtari me të kuqe, ndërsa është i vetmi finalist i kombëtares që ka shkuar në Europian me tre boksierë. Trajnerë të ekipit përfaqësues janë Artur Koçi, Kavdo Çekini dhe Leli Gega.

Sfidanti.al