Pas shkarkimit të Erik ten Hag, Manchester United duket se ka zgjedhur Ruben Amorim si pasues. Gatishmëria për të paguar klauzolën 10 milionë euro i është komunikuar Sporting Lisbonës, tani dy klubet po diskutojnë të gjitha detajet e tjera.

Në podcastin e The Overlap, legjenda e Red Devils, Paul Scholes tha fjalën e tij për vendimin: “Në Angli ne nuk shikojmë shumë futboll portugez, kështu që nuk dimë shumë për të. Unë kam parë Amorim dhe Sporting në Evropë dhe të gjitha gjërat që dëgjojmë janë të mira për të. Futboll emocionues, me tre mbrojtës dhe të bazuar në zotërimin e topit, nëse ai arrin ta bëjë këtë, mund të jetë emocionuese edhe në Premier League”.

Scholes, megjithatë, do të kishte dashur një emër tjetër për pankinën e United: “Unë mendoj se Thomas Tuchel ishte i duhuri për të menaxhuar Manchester-in, por padyshim që tani ai është trajneri i ri i Anglisë dhe nuk mund ta marrin atë. Ai është dikush që di të menaxhojë skuadrat më të mira, di të fitojë ndeshje të mëdha, ai tashmë ka luajtur disa”.