Kirsty Coventry u zgjodh të enjten si presidentja e 10-të e Komitetit Olimpik Ndërkombëtar. Ministrja 41-vjeçare e sportit të Zimbabvesë, një ish-notare që ka fituar dy medalje të arta olimpike, merr postin e presidentes të Komitetit Olimpik Ndërkombëtar, duke pasuar gjermanin Thomas Bach. Është hera e parë që presidenti i IOC nuk vjen nga Europa apo SHBA. Mandati i Kirsty Coventry do të zgjasë tetë vjet, me mundësinë e rizgjedhjes për një mandat tjetër katërvjeçar. “Është një nder dhe emocion i jashtëzakonshëm të zgjidhet president i Komitetit Olimpik Ndërkombëtar. “Dua të falënderoj sinqerisht kolegët e mi për besimin dhe mbështetjen e tyre”, tha fillimisht Coventry nga Greqia në fjalën e saj pasi zgjedhja e saj u bë në hotelin Costa Navarino në Messinia, ndërsa Asambleja e Komitetit Olimpik Ndërkombëtar u mbajt në Olimpin e Lashtë.

“Vajza e re që filloi të notonte në Zimbabve kaq shumë vite më parë nuk mund ta kishte ëndërruar kurrë këtë moment. Jam veçanërisht krenare që jam presidentja e parë femër e IOC dhe gjithashtu e para nga Afrika. Shpresoj që kjo votë të jetë frymëzim për shumë njerëz. Tavanet e xhamit janë thyer sot dhe jam plotësisht e vetëdijshme për përgjegjësitë e mia si model”, vijoi kreu i ri i Komitetit Olimpik Ndërkombëtar dhe përfundoi: “Sporti ka një fuqi të pashembullt për të bashkuar, frymëzuar dhe krijuar mundësi për të gjithë dhe unë jam e përkushtuar, që të përfitojmë sa më shumë nga kjo fuqi. Së bashku me të gjithë familjen olimpike, duke përfshirë atletët, tifozët dhe sponsorët, ne do të ndërtojmë mbi themelet tona të forta, do të përqafojmë inovacionin dhe do të mbrojmë vlerat e miqësisë, përsosmërisë dhe respektit. E ardhmja e Lëvizjes Olimpike është e ndritshme dhe mezi pres të filloj”. Presidenti në largim, Thomas Bach, pasi uroi pasardhësin e tij, vuri në dukje: “Unë mirëpres ngrohtësisht vendimin e anëtarëve të IOC dhe pres një bashkëpunim të fortë, veçanërisht gjatë periudhës së tranzicionit. Nuk ka dyshim se e ardhmja për Lëvizjen tonë Olimpike është e ndritur dhe se vlerat për të cilat ne mbrojmë do të vazhdojnë të na udhëheqin në vitet në vijim”.

sfidanti.al