Në Premier League po përgatitet një nga marrëveshjet më të mëdha të historisë. Alexander Isak mund të lërë Newcastle për t’iu bashkuar Liverpoolit, në një transferim që pritet të thyejë çdo rekord financiar.

Sipas mediave britanike, “Magpies” e kanë vendosur çmimin e sulmuesit suedez në rreth 173 milionë euro, ndërsa oferta më e lartë e deritanishme e Liverpoolit ka qenë 127 milionë. Për momentin, diferenca mes palëve mbetet e madhe, por sinjalet për një kompromis po shtohen.

Lëvizja e parë ka ndodhur tashmë: Newcastle ka arritur marrëveshje për blerjen e Nick Woltemade, sulmuesit gjerman 23-vjeçar që shkëlqeu me Stuttgart, për 70 milionë euro plus bonuse. Ky transferim, më i shtrenjti në historinë e klubit, i hap rrugën largimit të Isak.

Newcastle synon edhe një tjetër përforcim në sulm, me Yoane Wissa të Brentford që mbetet objektiv kryesor, ndonëse klubi londinez i ka rezistuar ofertave mbi 45 milionë euro.

Situata mes Isak dhe Newcastle është acaruar pas deklaratave të lojtarit për “premtime të thyera”, çka e ka shtyrë klubin të reagojë ashpër dhe të mbajë qëndrimin se lojtari do të shitet vetëm në kushtet e tij.

Liverpool, nga ana tjetër, është i vetëdijshëm se për të bindur Newcastle duhet të shkojë mbi 136 milionë euro, rekord i vendosur këtë verë nga vetë “Reds” me transferimin e Florian Wirtz nga Bayer Leverkusen.

Nëse marrëveshja finalizohet, kalimi i Isak në “Anfield” do të shënojë transferimin më të shtrenjtë në historinë e Premier League.

sfidanti.al