Ish-mbrojtësi i djathtë brazilian, Dani Alves, i cili luajti për Barcelonën dhe Juventusin, ka arritur një fitore të rëndësishme në gjykatat spanjolle, duke arritur të rikuperojë 628 mijë euro, një shumë që i ishte mbajtur për shkak të një mosmarrëveshjeje ligjore me ish-gruan e tij, Dinorah Santana.

Vendimi i Gjykatës së Katalonjës konfirmon se ish-futbollisti e ka respektuar plotësisht marrëveshjen për mbështetjen e fëmijëve, të vendosur në vitin 2012, duke hedhur poshtë të gjitha llojet e akuzave për mosrespektim. Mosmarrëveshja lindi nga një padi e ngritur nga ish-gruaja e tij në vitin 2011, e cila pretendoi se Dani Alves nuk i kishte përmbushur detyrimet e tij financiare që nga ndarja. Megjithatë, Gjykata arriti në përfundimin se Dani Alves i kishte respektuar të gjitha angazhimet e përcaktuara në marrëveshje, duke urdhëruar kthimin e plotë të shumës dhe duke e dënuar Dinorah Santana të paguante shpenzimet ligjore.

Por braziliani 42-vjeçar nuk është ende plotësisht i çliruar nga problemet: gruaja e re që e akuzon atë për përdhunim ka paraqitur një ankesë kundër anulimit të dënimit të tij. Duke e rikthyer historinë, ish-lojtari i Juventusit u dënua në shkallën e parë me katër vjet e gjysmë burg për dhunë seksuale, vetëm për t’u liruar më 28 mars nga Gjykata e Apelit e Barcelonës, gjë që nxori në pah pasigurinë e akuzueses.

sfidanti.al