Sergio Conceição është shumë pranë marrjes së drejtimit të Fenerbahçes. Trajneri portugez, ish-teknik i Milanit, është shfaqur si kandidati kryesor për të marrë drejtimin e skuadrës turke, ndërsa zyrtarizimi mund të vijë që në orët e ardhshme. Fenerbahçe po kërkon një trajner të ri pas dorëheqjes së Ismail Kartal. Përkohësisht, drejtimi i ekipit iu besua Dirk Kuyt, por drejtuesit e klubit kanë nisur kërkimet për një emër të huaj që do të udhëheqë skuadrën në vazhdim të sezonit.

Fenerbahçe renditet aktualisht në vendin e gjashtë të kampionatit turk, me 16 pikë pas 10 javësh. Në fillim, favoriti për stolin ishte Julian Nagelsmann, por nga trajneri gjerman nuk pati sinjale pozitive. Klubi shqyrtoi më pas edhe emrat e Roberto Martinez, José Luis Mendilibar dhe Ernesto Valverde, pa arritur të finalizojë marrëveshjen me asnjërin prej tyre.

Në këto rrethana, Conceição duket se ka fituar garën. Portugezi vjen pas eksperiencës tek Al-Ittihad dhe dëshiron të rikthehet në futbollin europian. Sipas raportimeve të HT Sport, trajneri është nisur drejt Stambollit, ku pritet të takohet me drejtuesit e Fenerbahçes për të mbyllur marrëveshjen dhe për të nënshkruar kontratën e re. Nëse gjithçka përfundon sipas planit, Conceição mund të debutojë shumë shpejt në stolin e skuadrës turke. Fenerbahçe ka një sfidë të rëndësishme në Champions League të mërkurën, përballë Liverpoolit, dhe portugezi mund të jetë që atëherë në krye të ekipit.