Shenjat janë të mira, ndonëse ende nuk mund të thuhet se ia kanë dalë. Dashamirësit që po mbledhin të ardhura financiare për t’i ardhur në ndihmës Besnik Çotës, ish-futbollistit të shquar të Sopotit të Librazhit, kanë arritur të sigurojnë gjysmën e shumës që duhet për operacionin. Flitet për rreth 35 000 euro, dhe shpresa është që të mblidhet edhe gjysma tjetër e parave për të bërë të mundur që ish-mesfushori i njohur të realizojë transplantin e njërës prej veshkave. Çota, sot 53 vjeç, vuan prej të paktën 7 vitesh nga një sëmundje e veshkave dhe është i detyruar të bëjë dializë çdo dy ditë. Përtej sëmundjes, Besniku duket mirë me shëndet, është në lëvizje, del dhe pi kafe me shoqërinë, si dhe ndjek ndeshjet apo aktivitetet sportive e kulturore në Librazht. Besnik Çota ka qenë pjesë e atij që mund të quhet brezi i artë i futbollittë Librazhdit, që në vitet 90-të e ngjiti ekipin e Sopotit në elitë, duke e mbajtur aty për disa vjet. Pasi e la futbollin rreth moshës 32-vjeçare, Çota punoi si trajner dhe drejtues i klubit, si anëtar i bordit, ndërsa sot është në rolin e drejtorit teknik.

Sfidanti.al