Mungesa e Mirlind Dakut në ndeshjen e fundit të Rubin Kazan në kampionatin rus fillimisht shkaktoi habi, por situata duket se është serioze.

Sulmuesi shqiptar, i cili ka qenë një ndër lojtarët më të rëndësishëm të skuadrës ruse këtë sezon, po përballet me një dëmtim që mund ta mbajë jashtë fushave për një kohë më të gjatë sesa pritej.

Pasi mungoi në humbjen e thellë 0-4 të Rubinit ndaj Zenitit, trajneri i skuadrës nga Kazani, Rashid Rahimov, sqaroi situatën në një konferencë për shtyp, duke dhënë një lajm aspak të mirë.

Sipas tij, Mirlind Daku ka një dëmtim të vështirë dhe mund të ketë nevojë për ndërhyrje kirurgjikale, e cila pritet ta lërë jashtë për pjesën e mbetur të sezonit.

“Mirlind Daku ka një dëmtim të vështirë. Mund të ketë nevojë për një ndërhyrje të vogël kirurgjikale, dhe nuk e dimë ende nëse do të mund të kthehet para fundit të sezonit.”

Kjo deklaratë ka shkaktuar alarm si në klubin rus, ashtu edhe në Kombëtaren shqiptare, me kuqezinjtë që më 7 qershor presin në “Arenën Kombëtare” përballjen historike me Serbinë, në kuadër të eliminatoreve të Botërorit 2026.

sfidanti.al