FIFA shpreson që të 16 qytetet e caktuara do të jenë “gati” për të pritur ndeshjet e finaleve të Kupës së Botës FIFA 2026 në Shtetet e Bashkuara, Meksikë dhe Kanada, duke përmbushur të gjitha kërkesat e nevojshme. Një zëdhënës i federatës ndërkombëtare e bëri këtë deklaratë pasi Presidenti i SHBA-së Donald Trump ngriti mundësinë e zhvendosjes së disa ndeshjeve nga qytetet tashmë të caktuara, përfshirë Boston dhe Los Angeles, për arsye sigurie.

“Shpresojmë që secili prej 16 qyteteve të caktuara për turneun të jetë gati për të pritur me sukses dhe për të përmbushur të gjitha kërkesat e nevojshme”, tha një zëdhënës i FIFA-s. “Siguria është përparësia kryesore në të gjitha ngjarjet e FIFA-s në mbarë botën, por padyshim që është përgjegjësi e qeverive, të cilat vendosin se çfarë është në interesin më të mirë të sigurisë publike”. Shtetet e Bashkuara do të presin shumicën e ndeshjeve të turneut me 48 ekipe. Njëmbëdhjetë nga 16 vendet e zhvillimit ndodhen në Shtetet e Bashkuara për turneun, i cili zhvillohet nga 11 qershori deri më 19 korrik. Dje, Trump deklaroi se Presidenti i FIFA-s, Gianni Infantino, do të binte dakord të zhvendoste ndeshjet e Kupës së Botës 2026 në vende të ndryshme në rast të shqetësimeve për sigurinë në qytetet amerikane që i presin ato. Vetë Presidenti i SHBA-së, Trump, e kishte ngritur mundësinë e një mase të tillë si pjesë të veprimeve të tij kundër disa qyteteve të udhëhequra nga demokratët.

sfidanti.al