Etapa e sulmuesit Antony te Real Betisi, të paktën për momentin, ka marrë fund. Kontrata e tij e huazimit nga Manchester United përfundon më 30 qershor dhe futbollisti brazilian ka zgjedhur të përshëndetet me tifozët përmes një videoje të ngarkuar në Instagram, e shoqëruar me një letër prekëse që reflekton eksperiencën e tij në klubin andaluzian.
“Sot mbyllet një nga kapitujt më të bukur të jetës sime. Të dua shumë, Betis”, shkruan ai me emocion të thellë.
Në letrën e tij të hapur, Antony shpreh mirënjohje për gjithçka që ka përjetuar gjatë kësaj periudhe:
Braziliani kujton edhe momentet e errëta të karrierës së tij:
“Jeta më çoi larg – nga favela në botë. U largova nga Brazili, luajta në Holandë, në Angli. Nga një djalë i ri u ktheva në baba. Shumë gjëra ndryshuan. Por futbolli, ai gjithmonë ishte aty. Derisa një ditë gjithçka u shemb. Nga qielli në ferr. Topi nuk hynte më, gëzimi humbi, bota ime u errësua dhe fillova të dyshoj te vetja. Te talenti im, te pasioni për futbollin. Dhe pikërisht atëherë, futbolli më dhuroi një dhuratë të fundit. Ju.”
“Kur mbërrita këtu, nuk e dija çfarë të prisja. Por as në ëndrrat më të bukura nuk e kisha imagjinuar atë që gjeta. Që në hapat e parë në këtë klub, ndjeva diçka ndryshe. Ishte si të kthehesha në shtëpi. Si të gjeja një pjesë të vetes që besoja se e kisha humbur. Me ju, rifillova të buzëqesh. Me ju, gjeta sërish djalin e dikurshëm, atë që e donte futbollin me gjithë zemër. Me ju, futbolli u bë sërish dashuri. Dashuri e vërtetë.”
Ai përfundon me një mesazh dashurie për klubin dhe tifozët:
“Faleminderit që më pranuat si pjesë të familjes. Faleminderit që ma kthyet gëzimin e të luajturit futboll. Faleminderit që më kujtuat pse u dashurova me këtë lojë. Shtëpia ime, njerëzit e mi, ¡Mucho Betis Siempre!”
Ndërkohë, Real Betisi dhe Manchester United do të takohen javën e ardhshme për të diskutuar të ardhmen e brazilianit. Siç raporton MARCA, klubi anglez është i interesuar të rikuperojë një pjesë të investimit të madh të bërë për Antony, veçanërisht pas mungesës në garat europiane sezonin që vjen. Nga ana tjetër, Antony është i lumtur në Sevilje dhe dëshiron të vazhdojë të jetë pjesë e këtij projekti emocionues në ‘Benito Villamarín’, pas një huazimi katërmujor ku ka arritur deri në një finale europiane me Betisin.
sfidanti.al
