UEFA ka lëshuar një deklaratë mbi pjesëmarrjen e Izraelit në garat ndërkombëtare, në një kohë kur po shtohen thirrjet për përjashtimin e këtij vendi nga futbolli. Që nga fillimi i luftës Izrael–Gaza në tetor 2023, mbi 80 mijë persona janë vrarë në Gaza deri në qershor 2025, sipas raporteve ndërkombëtare.
Situata humanitare është përkeqësuar ndjeshëm, me Programin Botëror të Ushqimit të OKB-së që paralajmëron se 500 mijë banorë janë “në prag të urisë” dhe kanë nevojë urgjente për ndihmë.
Të enjten e kaluar, UEFA publikoi një postim në rrjetin social X për vdekjen e ish-futbollistit palestinez Suleiman Al-Obeid, por pa dhënë detaje mbi rrethanat.
Ylli i Liverpoolit, Mohamed Salah, reagoi duke pyetur: “A mund të na tregoni se si vdiq, ku dhe pse?”.
Shoqata e Futbollit të Palestinës deklaroi se Obeidi u vra në një sulm izraelit në jug të Gazës, ndërsa priste ndihma humanitare.
Gjatë transmetimit të ndeshjes së Community Shield mes Liverpoolit dhe Crystal Palace, ish-ylli i Egjiptit, Mohamed Aboutrika, i bëri thirrje FIFA-s dhe UEFA-s të ndjekin të njëjtin shembull si me Rusinë pas agresionit ndaj Ukrainës dhe të përjashtojnë Izraelin nga futbolli ndërkombëtar.
“Janë 760 atletë palestinezë të vrarë nga Izraeli, përfshirë 420 futbollistë, ndërsa 140 objekte sportive janë shkatërruar”, deklaroi Aboutrika.
“Nëse FIFA dhe UEFA nuk marrin masa, atëherë janë bashkëfajtore — ashtu siç jemi edhe ne nëse heshtim”.
UEFA ka dhënë rrallëherë komente të drejtpërdrejta mbi këtë çështje, por në shkurt 2024, sekretari i përgjithshëm Theodore Theodoridis u shpreh se situata mes Izraelit dhe Gazës është “krejtësisht e ndryshme” nga ajo mes Rusisë dhe Ukrainës.
Para ndeshjes së Superkupës PSG–Tottenham këtë javë, UEFA shpalosi një banderolë me mbishkrimin: “Ndalo vrasjen e fëmijëve. Ndalo vrasjen e civilëve”.
Mesazhi nuk përmendi drejtpërdrejt Gazën, dhe sipas një burimi të brendshëm të UEFA-s, ishte “jo politik, por humanitar”.
Presidenti i UEFA-s, Aleksandar Ceferin, tha: “Fëmijët janë të pafajshëm në çdo konflikt. Duhet të bëjmë gjithçka për të ndihmuar ata që punojnë për t’ua bërë jetën më të durueshme dhe më të afërt me normalitetin, edhe në rrethanat më të vështira”.
sfidanti.al
