Ish-trajneri i Manchester United, Erik ten Hag, është i interesuar për postin e trajnerit te Juventusi, raporton “talkSPORT”. Ten Hag u shkarkua nga United në tetor 2024 dhe ka qenë pa klub që nga ajo kohë. Juventusi shkarkoi Thiago Motta të dielën, me ekipin që ndodhet aktualisht në vendin e pestë në Serie A, 12 pikë pas Interit. Për momentin, Igor Tudor është emëruar trajner i përkohshëm me një kontratë fillestare deri në fund të sezonit.
Motta qëndroi në krye të Juventusit vetëm për tetë muaj, duke lënë një përshtypje pozitive më parë te Bologna, ku arriti të kualifikohet për Ligën e Kampionëve sezonin e kaluar. Ai humbi vetëm tre ndeshje në kampionat si trajner i “Zonjës së Vjetër”, por barazoi 13 ndeshje, të njëjtin numër sa fitoi, duke çuar skuadrën në pozitën aktuale në tabelë. Dy nga humbjet e tij në kampionat erdhën në dy ndeshjet e fundit, një humbje 4-0 ndaj Atalantës dhe një tjetër 3-0 kundër Fiorentinës. Skuadra e tij gjithashtu u eliminua nga Liga e Kampionëve pas një humbjeje ndaj PSV Eindhoven në fazën e play-off, një ekip që më pas humbi 9-3 në total ndaj Arsenalit në fazën e 16-tave.
Megjithatë, falë vetëm tre humbjeve, Juventus është vetëm një pikë larg Bolognas që është në vendin e katërt dhe gjashtë pikë pas Atalantas në vendin e tretë.
Hierarkia e klubit mund të konsiderojë Ten Hag si njeriun që mund ta kthejë gjendjen në të mirë të Juventusit.
Pavarësisht një periudhe të turbullt te Manchester United, holandezi fitoi Carabao Cup në vitin 2023 dhe FA Cup vitin e kaluar, duke mundur Manchester Cityn. Para se të arrinte në Manchester, ai grumbulloi disa trofe te gjiganti holandez, Ajax. Ai fitoi tri tituj kampion, dy kupa të Holandës dhe një Superkupë të Holandës, si dhe një rrugëtim të jashtëzakonshëm në gjysmëfinalen e Ligës së Kampionëve në sezonin 2018-2019, ku mundën Real Madridin. Megjithatë, raportimet italiane thonë se Roberto Mancini, trajneri aktual i Al Nassr, Stefano Pioli dhe trajneri i Atalantës, Gian Piero Gasperini, janë gjithashtu duke u konsideruar për pozitën e trajnerit të përhershëm te Juventusi.
sfidanti.al
