Dusan Vlahovic përfundon sërish në qendër të debatit futbollistik edhe kur nuk luan. Një koment i tij në pankinë ka shkaktuar polemika mes tifozëve të Juventus, dhe jo vetëm, pas fitores 2-1 në fushën e Como. Sulmuesi serb, i filmuar nga kamerat e DAZN teksa fliste me Mattia Perin, ka kritikuar mbrojtësin e skuadrës së tij, Federico Gatti: “Nuk e kuptoj Gatti, nuk shikon njeriun. Në aksionin e pjesës së dytë, top i gjatë dhe ai shikon vetëm topin. Çfarë bën? Shikon topin! Imponohu me trup, nuk mund të të spostojnë, përndryshe është karton i verdhë”. Fjalët e Vlahovic, të zbuluara pas ndeshjes, ndezën menjëherë diskutime në ambientin bardhezi. Edhe pse fitorja në stadiumin Sinigaglia solli gëzim, paraqitja e ekipit të teknikut Thiago Motta nuk i bindi plotësisht tifozët. Kamerat e DAZN kapën momentin kur Vlahovic, pak para golit të Kolo Muani për 2-1, po fliste me Perin dhe shprehte dyshime për mënyrën si mbronte Gatti: “Nuk e kuptoj Gatti. Nuk shikon kurrë kundërshtarin, vetëm topin. Top i gjatë dhe çfarë bën? Shikon topin! Impono trupin! Nuk mund të të lëvizin”.

Portieri i dytë i Juventus e dëgjoi pa reaguar, por fjalët e numrit 9 bardhezi nuk kaluan pa u vënë re, duke u bërë menjëherë objekt diskutimi mes tifozëve të Zonjës së Vjetër. Pavarësisht fjalëve të tij, marrëdhënia mes Vlahovic-it dhe Gatti-t është e mirë dhe mes tyre nuk ka pasur përplasje. Përkundrazi, të dy kanë treguar disa herë se kanë një miqësi të fortë. Ndoshta edhe për këtë arsye, sulmuesi serb u ndje i lirë ta kritikonte në atë mënyrë shokun e tij, por ky episod duket si një tjetër sinjal alarmi për situatën që po kalon Juventus. Dusan Vlahovic qëndroi në pankinë për 90 minuta ndaj Como-s dhe tashmë Kolo Muani duket se i ka rrëmbyer vendin si titullar. Madje, edhe në momentin më kritik, kur rezultati ishte 1-1, Thiago Motta nuk e aktivizoi për të forcuar sulmin bardhezi.

sfidanti.al