Le ta lemë prapa humbjen me Poloninë, sepse kombëtarja shqiptare ka lojtarë që mund ta ndihmojnë në të ardhmen. Njëri prej tyre është Rej Manaj, i kritikuar shumë nga tifozët kuqezinj për egoizmin që tregoi në ndeshjen eleminatore të Botërorit, por që e ka ngritur më në fund karrierën në këmbë dhe ka nisur të bëhet protagonist në Serinë A. Ish-talenti i Interit dhe lojtari i Barcelonës, hyri në fushë në pjesën e dytë dje për Specian në fitoren 2-1 ndaj Salernitanës. Manaj u aktivizua në 68’, kur shifrat ishin 1-1 dhe menjëherë krijoi rrezik duke goditur portën mike. Më pas, ai kombinoi me kapitenin Maxhore i cili u ndal nga portieri mik, Belec. Më pas, sulmuesi 24-vjeçar bëri presion në çdo moment ndaj topit duke ndihmuar ekipin që shënoi golin e fitores në 76’, 8 minuta pas hyrjes së tij në fushë, edhe pse nuk ishte pjesëmarrës në aksionin e golit, shënuar nga Kovalenko. Një fitore e rëndësishme për Specian, e dyta këtë sezon në Serinë A, që u ngjit në kuotën e 7 pikëve duke pasur shpresë për mbijetesë.

Sfidanti.al