Manchester City po vuan, por Erling Braut Haaland mbetet një siguri. Pavarësisht humbjes së dytë në tri ndeshje të ligës, norvegjezi vazhdon të bëjë histori në futbollin anglez. Me golin e djeshëm kundër Brighton, sulmuesi tani ka arritur në kuotën e 88 golave në Premier League në 100 paraqitjet e tij të para, duke vendosur një rekord të ri të të gjitha kohërave në historinë e ligës. Asnjë lojtar para tij nuk ka arritur të shënojë kaq shumë në kaq ndeshje.

Rekordi i mëparshëm i përkiste Alan Shearer, i cili shënoi 79 gola në 100 ndeshjet e tij të para në Premier League, përpara se të arrinte 260 gola në 441 ndeshje. Pas Haaland janë emra të shquar si Ruud van Nistelrooy, i cili shënoi 68 gola, dhe Sergio Agüero, i cili shënoi 64 në 100 ndeshjet e tij të para në ligë.

Ish-lojtari i Borussia Dortmund ka demonstruar qëndrueshmëri mbresëlënëse: në përgjithësi për Manchester Cityn, ai ka shënuar 127 gola në 149 paraqitje, ndërsa në të gjitha klubet për të cilat ka luajtur, ai ka shënuar 262 gola në 332 ndeshje.

Në vetëm tre sezone të plota në Angli, Haaland ka fituar tashmë dy herë çmimin e golashënuesit më të mirë, duke vendosur një rekord në ligë prej 36 golash në sezonin e tij të parë. Aftësia e tij sulmuese ka kontribuar ndjeshëm në shtatë trofetë e mëdhenj që Manchester City ka fituar që nga mbërritja e norvegjezit në Etihad.

sfidanti.al