Nuk ishte momenti për të humbur, madje as për të lënë pikë. Pavarësisht krizës, askush nuk besonte se Kukësi kampion do të pësonte disfatë në shtëpi me Lushnjen e vendit të fundit, por pikërisht kjo ndodhi. Skuadra e drejtuar nga Mladen Milinkoviç u mposht 1-3 duke e vënë edhe më shumë në rrezik objektivin minimal të sezonit, kualifikimin për në Ligën e Europës nga Superliga.

Paraqitja ishte e tillë që nuk mund të thuhej me siguri nëse ishte vetë skuadra që luajti ashtu për të larguar trajnerin, apo i tillë është kapaciteti i kampionëve të Milinkoviçit. Myzeqarët luajtën si në shtëpinë e tyre, krejt ndryshe nga përballja e kaluar kur u mundën në Lushnje 0-3 nga Partizani. Kaluan në avantazh me anë të Prençit, patën raste, dhe nuk u tronditën aspak kur Kukësi barazoi me nisjen e pjesës së dytë. Golit të Bakajt iu përgjigj veterani Sefa. Kapiteni lushnjar, sulmuesi kryesor i ekipit realizoi dy herë, duke e bërë të sigurt fitoren dhe duke i dhënë shpresë skuadrës së trajnerit Hysen Dedja se mund të luftojë edhe për mbijetesë. Edhe pse në vendin e fundit, Lushnja nuk është shumë larg zonës që të mban në Superligë.

Sa për Kukësin, ky mund të quhet fillimi i fundit. Do të jetë e vështirë që kjo skuadër të arrijë Europën, duke pasur parasysh rivalitetin me Kamzën, Flamurtarin, Partizanin dhe pse jo edhe me Laçin.

Sfidanti.al