Bayern Munich ka hyrë në garë për Ibrahim Mbaye, me klubin gjerman që po monitoron nga afër situatën e anësorit të Paris Saint-Germainit. Lajmi është bërë i ditur nga eksperti italian i merkatos, Nicolo Schira. E ardhmja e talentit senegalez mbetet e hapur në ditët e fundit të merkatos, pasi Mbaye po kërkon të largohet nga PSG-ja për të gjetur një skuadër ku mund të ketë më shumë minuta dhe hapësirë në formacion.

Edhe PSG-ja është e hapur për shitjen e lojtarit, por klubi francez kërkon një ofertë të konsiderueshme për të lejuar largimin e tij. Bayern Munich po e ndjek nga afër situatën, ndërsa bavarezët kërkojnë të shtojnë alternativat në repartin ofensiv para mbylljes së afatit kalimtar. Mbaye ka tërhequr interes edhe nga Liverpooli, por PSG-ja së fundmi ka refuzuar një propozim nga klubi anglez. Tashmë, Bayern Munich është një tjetër klub që po shqyrton mundësinë e transferimit të talentit të PSG-së, ndërsa e ardhmja e tij pritet të qartësohet para mbylljes së merkatos.