Finalja e Kupës së Botës 2026 mes Spanjës dhe Argjentinës nuk u mbyll vetëm me triumfin e “La Roja”, por edhe me një përleshje të madhe pas vërshëllimës përfundimtare.

Në qendër të incidentit ishte mesfushori argjentinas Leandro Paredes, i cili humbi kontrollin pas përfundimit të ndeshjes. Pamjet që u bënë menjëherë virale tregojnë ish-lojtarin e Romës dhe Juventusit duke kapur për fyti Eric Garcían dhe më pas duke rrëzuar në tokë Gavin, i cili kishte ndërhyrë për të mbrojtur shokun e skuadrës.

Situata u qetësua vetëm falë ndërhyrjes së trajnerit të Argjentinës, Lionel Scaloni, dhe ndihmësit të tij Walter Samuel. Paredes u ndëshkua me karton të kuq edhe pse ndeshja kishte përfunduar, ndërsa paralelisht në fushë pati edhe një përplasje verbale mes Nicolás Otamendit dhe kapitenit të Spanjës, Rodri.

Pas ndeshjes ishte vetë Gavi ai që zbuloi se çfarë i kishte thënë Paredesit para se ky të shpërthente. “Thjesht e pyeta: ‘Infantino nuk iu përgjigj telefonatave tuaja këtë herë?’ Sapo e thashë këtë, ai humbi plotësisht kontrollin. Nuk më la as ta përfundoja fjalinë”, deklaroi mesfushori 21-vjeçar i Barcelonës për mediat spanjolle.

Gavi zbuloi gjithashtu se kishte ndërmend ta përfundonte komentin me një tjetër frazë provokuese. “Doja t’i thosha edhe se futbolli më në fund e mposhti korrupsionin.”

Deklaratat e spanjollit pritet të ndezin edhe më shumë polemikat pas finales, e cila u shoqërua me tensione të shumta brenda dhe jashtë fushës.