Interi ka hyrë në një fazë të re planifikimi për sezonin 2026/27, ndërsa drejtuesit po përballen me interes serioz nga Bayerni i Mynihut për mbrojtësin Yann Bisseck. Klubi italian ka vendosur një çmim prej 45 milionë eurosh për kartonin e tij. Sipas raportimeve, drejtori sportiv, Beppe Marotta, dhe trajneri, Cristian Chivu, kanë diskutuar tashmë strategjinë e merkatos, veçanërisht në repartin e mbrojtjes, ku priten ndryshime të rëndësishme. Largimi i Francesco Acerbit është i sigurt si lojtar i lirë, ndërsa për Stefan de Vrij mbetet ende mundësia e rinovimit. Megjithatë, situata më e ndjeshme është ajo e Bisseck, i cili ka tërhequr interes të madh nga Bayerni.

Klubi gjerman e sheh mbrojtësin si një objektiv prioritar, ndërsa Interi është i gatshëm të dëgjojë oferta vetëm nëse ato arrijnë në 40–45 milionë euro. Bisseck është blerë për rreth 7 milionë euro në vitin 2023, ndaj një shitje e tillë do të përfaqësonte një fitim të madh për klubin milanez. Në rast largimi të tij, Interi nuk do të mbetet pa përgjigje. Plani i drejtuesve është një “goditje e dyfishtë” në mbrojtje, me objektiva kryesorë Tarik Muharemovic dhe Oumar Solet. Muharemovic, i vlerësuar rreth 20 milionë euro, shihet si një alternativë e rëndësishme për qendrën e mbrojtjes, ndërsa Solet, i ndjekur prej kohësh nga Interi dhe i vlerësuar rreth 30 milionë euro, do të përfaqësonte një investim më të madh dhe profil titullari.

Në total, paketa e dy mbrojtësve do të kërkonte rreth 50 milionë euro, një shifër që praktikisht do të balancohej nga shitja e Bisseck. Në këtë skenar, Solet do të përdorej në krahun e djathtë të mbrojtjes me tre, ndërsa Muharemovic do të shërbente si alternativë në qendër. Megjithatë, e ardhmja e repartit defensiv të Interit mbetet e hapur, pasi gjithçka mund të varet edhe nga qëndrimi i lojtarëve kyç në skuadër.

Sfidanti.al