Mesfushori i Manchester Cityt, Bernardo Silva, ka pranuar se skuadra e tij ishte e vetëdijshme se gara për titullin e Premier League do të ishte praktikisht e përfunduar në rast humbjeje ndaj Liverpoolit, përpara fitores dramatike në “Anfield”.

Portugezi theksoi se ekipi i Pep Guardiolës ishte vetëm disa minuta larg shuarjes së shpresave për titull, përpara se rikthimi spektakolar t’u jepte “Qytetarëve” një frymë të re në ndjekjen e Arsenalit.

“Për diferencën që kemi për të rikuperuar ndaj Arsenalit, ishte e rëndësishme të kërkonim edhe një gol tjetër pasi barazova,” u shpreh Silva.

“Isha i lumtur që u rikthyem në lojë, por e dinim se na duhej fitorja. Ky është vendi më i vështirë për të luajtur në Premier League dhe zakonisht edhe një pikë këtu është rezultat i mirë, por për ne nuk mjaftonte”.

Mesfushori portugez shtoi gjithashtu rëndësinë personale të suksesit në “Anfield”: “Është fitorja ime e parë këtu në nëntë vite, përjashto sezonin e Covidit. E dinim para ndeshjes se ndoshta gara për titull mbyllej nëse humbnim, ndaj e ndjemë se fitorja ishte e domosdoshme”.

Në fund, Silva theksoi se City nuk ka ndërmend të dorëzohet: “Ende ka shpresë dhe do të luftojmë deri në fund. Duhet të vazhdojmë të bëjmë punën tonë, diçka që nuk e kemi bërë gjithmonë mirë kohët e fundit. Po ta kishim bërë, do të ishim më afër Arsenalit tani.”

Aktualisht, Arsenali kryeson renditjen, me një avantazh prej gjashtë pikësh ndaj Manchester Cityt, ndërsa gara për titull mbetet ende e hapur.