Me startin zyrtar të sezonit 2026 të Formula 1, i cili do të nisë më 6 mars në Australi, skuadrat po kompletojnë përgatitjet e fundit. Megjithatë, pak më shumë se një muaj para nisjes së kampionatit, vetëm një ekip ende nuk ka emëruar pilot rezervë: Audi. Të gjitha skuadrat e tjera tashmë kanë të paktën një pilot rezervë, ndërsa McLaren dhe Haas kanë shkuar edhe më tej, duke emëruar nga dy. Kampionët në fuqi, McLaren, do të mbështeten te Leonardo Fornaroli, kampion i Formula 2, dhe tek ‘ylli’ i IndyCar, Pato O’Ward. Ndërkohë, Haas ka zgjedhur Rio Hirakawa dhe Jack Doohan, ky i fundit i afruar së fundmi. Një rast interesant është ai i Yuki Tsunoda, i cili do të shërbejë si pilot rezervë për dy skuadra njëkohësisht, Red Bull dhe Racing Bulls, një praktikë jo e pazakontë për pilotët e programit Red Bull. Japonezi do të jetë gati për të zëvendësuar në rast nevoje cilindo prej dy ekipeve.
Duhet theksuar se shumë nga pilotët rezervë janë të angazhuar edhe në kampionate të tjera, çka do t’i pengojë të jenë gjithmonë në dispozicion. Një shembull është Antonio Giovinazzi, rezervë te Ferrari në Formula 1, por njëkohësisht pilot titullar i Scuderia Ferrari në Kampionatin Botëror të Qëndrueshmërisë (WEC). Në kalendarin e vitit 2026, Formula 1 dhe WEC përplasen në gjashtë data, duke e bërë Giovinazzi-n të padisponueshëm për garat në Japoni, Arabinë Saudite, Barcelonë, Itali, Azerbajxhan dhe São Paulo.
Lista e pilotëve rezervë për sezonin 2026 të Formula 1:
- Alpine – Paul Aron
- Aston Martin – Jack Crawford
- Audi – ende i panjohur
- Cadillac – Guanyu Zhou
- McLaren – Leonardo Fornaroli, Pato O’Ward
- Mercedes – Frederik Vesti
- Red Bull – Yuki Tsunoda
- Racing Bulls – Yuki Tsunoda
- Williams – Luke Browning
- Ferrari – Antonio Giovinazzi
- Haas – Jack Doohan, Rio Hirakawa
Në pritje mbetet vetëm Audi, që duhet të zgjidhë sa më shpejt çështjen e pilotit rezervë, ndërsa sezoni i ri i Formulës 1 po afrohet me hapa të shpejtë.
