Në prag të sfidës kualifikuese ndaj Serbisë, e vlefshme për kualifikueset e Kampionatit Botëror 2026, mesfushori Julian Shehu doli sot në një konferencë për media, e zhvilluar në stadiumin “Air Albania”. Ai theksoi rëndësinë e kësaj ndeshjeje dhe synimin për të marrë një rezultat pozitiv. “Ne jemi futbollistë profesionistë. Për ne, presioni është gjë normale. Është një ndeshje pa dyshim e rëndësishme për ne, por ne do të shkojmë aty për të marrë maksimumin e mundshëm”. Dëshira e të gjithë skuadrës është të vazhdojë rrugëtimin në kualifikueset e Botërorit 2026 e sfida kundër Serbisë, është një finale që na çon më afër Botërorit: “Kjo është ndeshje e rëndësisë shumë të madhe për ne, për vetë faktin se nga kjo ndeshje besoj se vendoset edhe vazhdimësia e objektivit që kemi për të shkuar në Botëror. Është ndeshje decizive për objektivin që ne kemi, prandaj jemi shumë të përqendruar që të marrim maksimumin dhe të vazhdojmë ëndrrën që kemi për të shkuar në Botëror”. Shehu është i bindur për impaktin pozitiv që sjellë në Kombëtare dhe idetë i ka të qarta për rrugën që duhet të përshkojë: “Kam sjellë versionin më të mirë timin te Kombëtarja, pavarësisht pozicionit dhe taktikave, dhe do të vazhdoj të bëj më të mirën time për Kombëtaren”.