Duhen edhe dy ndeshje, por Europa është pranë.  Me Armando Sadikun në skuadër, Lugano mund të ëndërrojë një kualifikim kontinental që as nuk e mendonte. Sulmuesi i kombëtares shqiptare shënoi golin e parë në fitoren 2-1 ndaj Vaducit, duke e ngjitur në vend të tretë ekipin e drejtuar nga ish-ndihmësi i De Biazit, Paolo Tramexani.

Ishte rrjeta numër 9 në 15 ndeshje në kampionat, si dhe një nga golat që zbritën në kategorinë e dytë, Vaducin, ekipin që Sadiku luajti vjet. Davide Mariani shënoi golin e dytë për vendasit, ndërsa Aksel Borgman nuk e shpëtoi dot skuadrën e tij nga humbja. Lugano ka 50 pikë, ndërsa rivalët Sion e Lucernë nuk janë larg.

Një tjetër gol shqiptar, tepër i bukur, u shënua në Shtetet e Bashkuara të Amerikës. Autori ishte Jahmir Hyka, edhe ai lojtar i përfaqësueses. Shtatshkurtri tiranas i dha fitoren San Hozesë 9 minuta para fundit të duelit ndaj Dallasit. Vetëm një veprim klasi si ai i Hykës mund të zgjidhte këtë ndeshje që po shkonte drejt barazimit.

Ky ishte goli i tretë sezonal i shqiptarit, që pati edhe një rrjetë të anuluar më parë. San Hoze, ndërkaq, është në vendin e 4-të mes 11 ekipeve të Konferencës Perëndimore, me 19 pikë, jo larg vendeve të para.

Sfidanti.al