20 paraqitje, tre gola dhe dy asiste në gjashtë muaj. Koha e Xherdan Shaqirit te Interi ishte e vështirë, ndërsa të gjithë prisnin më shumë prej tij. I ardhur në janar të vitit 2015 nga Bayern me urdhër të trajnerit të atëhershëm të Interit, Roberto Mancini, supozohej të ishte transferimi i madh i atij afati kalimtar.

Megjithatë, fusha shpejt zbuloi një histori tjetër: “Interi më kishte ndjekur për njëfarë kohe. Mancini më telefonoi dhe më bindi brenda pesë minutash. Më tha se do të isha në qendër të projektit, por në vend të kësaj nuk luajta shumë. Sigurisht, problemet e zakonshme fizike luajtën gjithashtu një rol. Por, duke marrë parasysh gjithçka, mendoj se mund të më kishin dhënë pak më shumë kohë loje”, deklaroi Shaqiri në një intervistë për Gazzetta dello Sport.

Pavarësisht kësaj, Shaqiri thotë se ndihej rehat me shokët e ekipit: “Duhet të them se ishim një grup i mirë. Kalova shumë kohë me Kuzmanovic, të cilin e takova në ekipin e të rinjve të Bazelit. Gjithashtu kujtoj me nostalgji shumë të tjerë: Nagatomo, Juan Jesus, Dodo…”. Ish-numri 91 shpjegon se si ajo skuadër ishte vite dritë larg nga e sotmja: “Përfundova në një nga Interët më të dobët të 15 viteve të fundit. Ishim ndërtuar dobët, na mungonte ekuilibri dhe, sinqerisht, pa asnjë kampion, nuk ishim gati për të fituar”.

Dëmtimet kanë qenë një kundërshtar i vështirë gjatë gjithë karrierës së Shaqirit, duke e mbajtur atë jashtë fushave në shumë raste. Lojtari  është përballur edhe me to gjatë kohës së tij te Interi, duke zbuluar se është trajtuar nga një mjek disi “i pazakontë”: “Më shumë një ‘shaman’ sesa një mjek. Më thanë të shkoja te ky djalë që bënte mrekulli dhe që kishte trajtuar madje edhe Ronaldon, Fenomenin. Edhe Mancini ma tha këtë. Në vend të kësaj, ishte një përvojë katastrofike. Drejtova makinën për një orë e gjysmë, por nuk pati asnjë dobi”.

Shaqiri shprehu besimin e tij për Interin e Chivu: “Ata i kanë mbajtur të gjithë yjet e tyre dhe janë forcuar, kështu që duhet të shkojnë deri në fund në të gjitha garat. Ata mund të fitojnë titullin. San Siro është një vlerë e shtuar, mbaj mend që ishte një stadium fantastik”.

Derbi i Italisë do të luhet të shtunën, një ndeshje që i lejon Xherdanit të zbulojnë një sfond transferimi: “Mund të kisha qenë numri 10 i Juventusit disa vite më parë. Ata donin që unë të zëvendësoja Diegon, i cili ishte një mesfushor sulmues atje. Isha te Bayern dhe nuk luaja shumë më, dhe isha i hapur për një transferim. Por pastaj nuk ndodhi asgjë. Do të më kishte pëlqyer në atë kohë, por doli mirë, tani në Itali unë ‘mbështes’ zikaltërit”.

sfidanti.al