Komiteti i Kontrollit dhe Disiplinës i Federatës Ruse të Futbollit (CDC RFU) pritet të marrë masa kundër Zenit St. Petersburg, pas sjelljes së pahijshme të tifozëve në ndeshjen ndaj Rubin Kazanit. Më 12 gusht, Zenit mposhti Rubin Kazanin me rezultat 3-0 në Shën Petersburgun, në kuadër të raundit të dytë të fazës së grupeve të Kupës së Rusisë RPL. Në këtë sfidë, sulmuesi shqiptar Mirlind Daku arriti të shënojë një gol, i cili u anulua pas ndërhyrjes së VAR-it. Ky moment ndezi tifozët vendas, të cilët filluan të hidhnin brohoritje ofenduese ndaj 27-vjeçarit, veçanërisht për shkak se gjatë verës ai ishte i lidhur me një kalim të mundshëm te Zeniti, një transferim që nuk u realizua.

Ngjarja nuk ka kaluar pa u vënë re nga autoritetet sportive. Kryetari i Komitetit, Artur Grigoryants, konfirmoi se çështja do të shqyrtohet në mbledhjen e radhës. “Për ndeshjen Zenit-Rubin, do të shqyrtojmë brohoritjet masive të përsëritura me shprehje fyese nga tifozët e ekipit vendas drejtuar sulmuesit të ekipit mysafir, Mirlind Daku”, – tha Grigoryants për RIA Novosti. Kjo nënkupton se Zeniti rrezikon një dënim disiplinor, i cili mund të variojë nga gjoba financiare deri te masa më të ashpra në rast përsëritjeje. Në të njëjtën mbledhje të planifikuar më 20 gusht, Komiteti i RFU-së do të shqyrtojë edhe sjelljen e tifozëve të CSKA Moskës, të cilët kanë ofenduar rivalët e Spartakut gjatë një tjetër ndeshjeje të Kupës së Rusisë.

Ky është një tjetër rast që tregon për problemin e vazhdueshëm të sjelljes së tifozëve në futbollin rus, ku autoritetet e disiplinës po përpiqen të vendosin standarde më të forta për respektin në stadiume.

sfidanti.al